Niðjatal Eiríks Tómassonar
bónda í Hrauni á Ingjaldssandi

Þetta niðjatal er búið að vera mörg ár í vinnslu - og er enn í vinnslu. Reyndar eru niðjatöl í eðli sínu endalaus, þ.e. þau verða aldrei "tilbúin", því alltaf bætist við.

Þegar ég var kominn nokkuð af stað við þessa vinnu sá ég fljótt að að niðjar Eiríks Tómassonar yrðu a.m.k. 2500. Núna (28. apríl 2009) eru niðjar orðnir 3472 í gagnasafninu og enn veit ég um börn sem ég hef ekki upplýsingar um, en ég bjóst ekki við að niðjarnir yrðu svona margir. Ég vil þakka Oddi Helgasyni ættfræðingi fyrir allnokkra viðbót, en hann fór í gegn um talið mitt og bætti við bæði foreldrum maka og niðjum sem ég hafði ekki vitað um. Síðan hef ég svo sjálfur bætt um betur og fundið 200-300 manns í viðbót. Niðjatölin eru nú komin hér inn. Ég set dagsetningu efst í skrána til að menn sjái hvenær nýjasta útgáfa var gerð. Aðrir sem hafa komið með mjög gagnlegar ábendingar eru Ásgeir Svanbergsson og Reynir Björnsson. Þakka ég þeim kærlega fyrir yfirlesturinn.

Ýmsir hafa sent mér tölvupóst með leiðréttingum og viðbótum, aðrir hafa hringt og látið mig vita að svo og svo mikið vanti af þeirra nánustu. Margir hafa lofað mér meiru, sumir hafa tekið fljótt við sér og sent mér gögn, frá öðrum hef ég ekki heyrt síðan. Mig langar að þakka öllum sem sent hafa upplýsingar og hvatt mig til dáða. Þá sem skoða þetta niðjatal og sjá að eitthvað vantar eða er rangt vil ég biðja um að senda mér upplýsingar og leiðréttingar, annað hvort í formi niðjatala frá ættarmótum eða að benda mér á aðrar heimildir sem mér hefur yfirsést eða ekki vitað um.

Duglegastir við að uppfærslurnar eru niðjar Þuríðar Eiríksdóttur, sem ég hef verið í mjög góðu sambandi við, sérstaklega Snæbjörn Ásgeirsson og Elsu E. Guðjónsson, en þeim tveim vil ég sérstaklega þakka miklar og góðar upplýsingar Einnig hefur Gunnsteinn Gunnarsson, niðji Kristínar Eiríksdóttur, verið mjög hjálplegur um sína nánustu.

Börn Eiríks Tómassonar og Kristínar Nikulásdóttur urðu 13, en af þeim eru tvö sem ekki áttu niðja og eitt sem ég hef ekki fundið niðja frá en gat alveg hafa átt niðja.

Ég vil sérstaklega biðja niðja Jóns og Tómasar að hafa samband ef þeir geta bætt við og/eða leiðrétt upplýsingar. Ég hef ekkert heyrt frá þeim.

Nokkuð sem kom mér á óvart þegar ég hóf þetta verk var að Kristín Nikulásdóttir átti systur sem var alnafna hennar og bjó í Patreksfirði. Kristín yngri (kona Eiríks Tómassonar) hafði sent elstu dóttur sína, Sigríði, til systur sinnar og hún hafði síðar gifst frænda sínum, syni Kristínar eldri. Um 1860 voru flest börn Kristínar yngri hjá móðursystur sinni og Finnur Eiríksson, forfaðir minn, fermdist í Otradalssókn. Þrjú systkinin, börn Kristínar yngri, áttu frændsystkini sín, börn Kristínar eldri, þau Sigríður (áður nefnd), Tómas og Soffía. Sigríður átti dóttur, sem Kristín hét. Sú varð bústýra föðurbróður síns og átti með honum tvö börn sem bæði dóu ung. Þannig var það nú. Töluverður eltingaleikur hefur verið við þetta fólk um Vestfirði og á ég enn eftir að elta einn í Dalina, en þangað fór hann í vist.

Í þessari útgáfu af niðjatalinu hef ég brotið það niður í jafnmargar skrár og börnin eru, ein skrá fyrir hvert barn. Þetta geri ég til þess að það sé auðveldara að prenta út niðjatöl viðkomandi systkinis af vefnum. Skrárnar verða frekar af viðráðanlegri stærð. Niðjatölin eru mjög misstór en niðjatal Þuríðar er stærst.

Ef einhver af ættinni les þetta og finnur sjálfan sig (með ctrl-F) í niðjatalinu, eða fer í nafnalistann, og getur bætt við eða leiðrétt, endilega hafið samband svo ég geti lagað talið og bætt við það. Ég tala nú ekki um ef einhver ætti niðjatal frá ættarmóti einhvers brots af þessari ætt yrði ég himinlifandi að fá upplýsingar um það - og helst eintak af niðjatalinu sem þannig er til komið.

Það sem helst vantar í niðjatalið sem er á netinu eru upplýsingar um fæðingar- og dánarstaði, upplýsingar um sambúðarform (í sambúð, sambúð slitið, giftingardaga, skilnaði) og foreldra maka með fæðingar- og dánardögum og -stöðum, auk sambúðarforms þeirra. Þá vantar örugglega eitthvað af niðjum Jóns og Tómasar, en frá þeirra niðjum hef ég ekki heyrt neitt.

Tölvupóstfang mitt heima

Reykjavík 28. apríl 2009.

Eiríkur Þ. Einarsson
Lindasmára 37
201 Kópavogur

sími 554-4454 og GSM 863-3154.

 ------------------------------------------------------------------------------------------------------------------

Eiríkur Tómasson,
f. 12. ágúst 1800,
d. 8. sept. 1849 - drukknaði í lendingu við Sæbólsbakka.
Bóndi í Hrauni á Ingjaldssandi.
[Arn., 2:433.]
- K. 27. okt. 1828,
Kristín Nikulásdóttir,
f. 26. sept. 1807 á Orrahóli, Fellsströnd,
d. 8. nóv. 1876.
For.: Nikulás Sigurðsson,
f. 1769 í maí,
d. 24. des. 1839.
Kom frá Orrahóli á Fellsströnd ásamt konu og dóttur árið 1823.
og k.h. Sigríður Ólafsdóttir,
f. 1768,
d. 27. júní 1847 - 79 ára.
Börn þeirra:
a) Sigríður Eiríksdóttir, f. 4. maí 1829, - 5 niðjar (descendants)
b) Þuríður Eiríksdóttir, f. 4. júní 1830, - 1061 niðji (descendants)
c) Ingibjörg Eiríksdóttir, f. 10. júní 1831, - 699 niðjar (descendants)
d) Kristín Eiríksdóttir, f. 4. sept. 1832, - 193 niðjar (descendants)
e) Guðrún Eiríksdóttir, f. 1. jan. 1834, - átti tvö börn sem dóu ung (2 descendants)
f) Tómas Eiríksson, f. 12. ágúst 1836, - 83 niðjar (descendants)
g) Guðbjörg Eiríksdóttir, f. 4. okt. 1837, - átti ekki niðja (0 descendants)
h) Jón Eiríksson, f. 3. des. 1839, - 26 niðjar (descendants)
i) Soffía Eiríksdóttir, f. 31. mars 1841, - 328 niðjar (descendants)
j) Finnur Eiríksson, f. 1. des. 1844, - 876 niðjar (descendants)
k) Lárus Eiríksson, f. 21. apríl 1846, - dó fjögurra daga gamall (died 4 days old)
l) Jónína Eiríksdóttir, f. 6. nóv. 1847, - hef ekki fundið neina niðja (0 descendants)
m) Ríkey Eiríksdóttir, f. 10. febr. 1850, - 262 niðjar (descendants).

Nafnalisti. Niðjar Eiríks Tómassonar í stafrófsröð og með krækjum.

Lagað 28.april. 2009